يا ليّل الشعر

يا ليل الشعر يا مْجمِع السًُمار---نجومك صَواني والوجوه قمار
وتَختَك تحت ظل الياسميني --- بيِدفى الليل لَ طلوع النهار
وعلى شبابيكَك الطرزات زيني --- وحوض فِيّو الورود زرار
وبنت حِلوي تْقِلك عطيني --- وشعْرها الْ بيموج فوقك نار
وشفاف خمريّي تنده سّْقيني--- وشَفي بِشُفي تحلّل الأسرار
عِشتي العُمر مقهوره وحزيني --- شْرِبتي المُر من لوعة الاقدار
يا ريتك من زمان بتسمعيني--- يا ريتك عُطر تاْ بِرطِل العَطار
وحُط العطر من عطرك عا جبيني--- وأتْحَمم بشذى ريحانك المعطار
يا ريتك كتاب فيّو بتسحريني --- الورق فيّو بحر والحِبر بَحار
وبين السطر والسطر خليني --- أغرق بموج البحر والأعصار
وأنا عم بغرق تكوني السفيني--- وتحمليني يا حنونه بلجة الأخطار
رسمتك قوس عَ بواب المديني --- شَبَهتك بلوحه من متحف الأثار
كتبتك قصيدي بلهفة سنيني --- زْرَعتِك عُمر عا دفتر الأشعار
وبعدو بمنامي خْيّالك بجيني--- مِثل الشتي بآخر شهر آذار
بيطرق بوابي ومن نومي بوعيني --- ويوعى الألم عاْ سكرة الأفكار
أنتي السما عَ شمالي ويميني --- أنتي الأرض والعشب والأزهار
أنتي صلاتي ومذهبي وديني --- وعشقي وغرامي وآخر المشوار
ومثل ما الجوهره بقلب الخزيني--- مأمني واللي بيحرسوها كثار
هيكي يا حياتي يا تقبريني ---جوه القلب عم بِحرسك تذكار
بْحِبك قصيدي بشمع تلويني ---بشيلك ربيع وبعشَقِك نَّوار
بْحِبِك حروف بْفَتّح تنويني---بْشَكِْلك بالحُب وبْكَلَلك بالغار
وبدل ما ودِعك وتودعيني---أبقي بالحلم عاْ قلبي تَعي
وشوفي بغيّبتِك شو صار